Kosningar

Vinsældir www.vikari.is hafa verið að aukast undanfarið og þykir vefurinn nógu álitlegur til að stjórnmálaflokkar vilji auglýsa þar. Ég græt það ekki enda byggist rekstrargrundvöllur www.vikari.is núorðið á auglýsingasölu. Það er svo spurning hvort aðrir flokkar fylgi í kjölfar Sjálfstæðisflokksins.

Auðveldara að eyða en afla

Afi heimsækir mig reglulega í vinnuna og oftar en ekki ræðum við veðurfarið og aflabrögðin hér í Víkinni. Í dag barst talið hins vegar að bæjarmálunum. Afi var í hreppsnefnd Hólshrepps á sínum tíma og hefur því eðlilega mikinn áhuga á málefnum sveitarfélagsins. Gamli maðurinn sagði mér frá fundi sem hann hafði nýlega setið þar sem til umfjöllunar voru tillögur um endurbætur á íbúðum aldraðra hér í bæ.

Þar sem bág fjárhagsstaða Bolungarvíkurkaupstaðar hefur verið mikið rædd í fjölmiðlum að undanförnum vissi afi að það væru litlir sem engir peningar í bæjarkassanum. Því spurði hann hvort það væri til einhverjir fjármunir til að ráðast í framkvæmd sem þessa. Ég veit ekki nákvæmlega hvaða svör afi fékk við þessari spurningu en hann upplýsti mig um að í gamla daga hefðu menn alltaf þurft að vera búnir að afla peninganna áður en þeim var eytt. Ég las það einnig út úr frásögn afa að nú í dag ætti fyrst að framkvæma en svo síðar meir ætti að reyna að fá styrki til að fjármagna verkin. Þetta var nokkuð sem gamli maðurinn átti erfitt með að skilja.

Afi kvaddi mig með þeim orðum að ég ætti að muna það væri mikið auðveldara að eyða peningum en að afla þeirra.

Þessi orð ættum við öll að hafa í huga þegar við stöndum frammi fyrir ákvörðunum sem snerta fjárhag okkar.

Rauðu djöflarnir

Ég verð að hrósa liðmönnum Manchester United fyrir frammistöðuna gegn Roma fyrr í kvöld þar sem þeir tóku Ítalana hreinlega í nefið. Það var meistarabragur á Man.Utd. í kvöld og ótrúlegt að hugsa til þess að leikur í 8 liða úrslitum Meistaradeildarinnar skuli hafa farið 7-1. Um miðjan seinni hálfleik fékk ég símtal frá Liverpool manni sem var staddur á Old Trafford og það má með sanni segja að stemmningin þar var frábær.

Aðdáendur Rauðu djöflana... til hamingju með glæstan sigur í kvöld. Aðdáandi Roma fær hins vegar samúðarkveðjur...

Fjármagnstekjur og atvinnustarfssemi

Að undanförnu hefur verið rætt um hvort skylda eigi einstaklingar sem hafa eingöngu fjármagnstekjur (og þ.a.l. engar launatekjur) til að reikna sér laun líkt og einstaklingar í eigin atvinnurekstri. Um leið þarf að skilgreina við hvaða skilyrði tekjur af fjármagni teljast atvinnustarfssemi. Til að nálgast viðfangsefnið setti ég upp þrjú mismunandi dæmi um hvernig einstaklingar ávaxta jafn háa fjárhæð.

Dæmi 1

Einstaklingur á 100 millj.kr. og ávaxtar þær í almennum innlánum - þ.e. leggur peninginn inn á bók - og fær 13% vexti á ári. Vaxtatekjur eru því 13 millj.kr. og af þeim eru greiddar 1,3 millj.kr. í fjármagnstekjuskatt.

Dæmi 2

Einstaklingur á 100 millj.kr. og felur verðbréfafyrirtæki að sjá um að ávaxta féð. Ársávöxtun verður 13% þannig að fjármagnstekjurnar verða 13 millj.kr. og af þeim greiðast 1,3 millj.kr. í fjármagnstekjuskatt. Verðbréfafyrirtækið tekur 700 þús.kr. í þóknun fyrir að sýsla með eignirnar.

Dæmi 3

Einstaklingur á 100 millj.kr. og ákveður að höndla sjálfur með þá fjárhæð. Eftir allt brask ársins kemur í ljós að ávöxtunin er 13%. Fjármagnstekjur eru því 13 millj.kr. og af þeim eru greiddar 1,3 millj.kr. í fjármagnstekjuskatt.

Í öllum tilvikunum eru þetta einu tekjur einstaklinganna, þeir fá einnig jafn háa ávöxtun og greiða því jafn háan fjármagnstekjuskatt til ríkisins. Þeir leggja hins vegar mismikið á sig til að ná árangri.

Nú kemur að spurningunni góðu, eiga þessir þrír einstaklingar að reikna sér laun vegna þessara fjármagnstekna? Í framhaldinu vakna fleiri spurningar. Hve há eiga launin að vera? Eiga launin að vera ákveðið hlutfall af fjármagnstekjum? Eiga þeir sem kaupa þjónustu af verðbréfafyrirtækjum að reikna sér laun þrátt fyrir að vera þegar búnir að greiða öðrum fyrir vinnuna? Skiptir það máli hvort fjármagnstekjurnar séu tilkomnar vegna viðskipta með verðbréf eða vegna innistæðu á bankareikningi?

Í mínum huga gengur þessi hugmynd ekki upp. Með því að segja að viðkomandi einstaklingar eigi að reikna sér laun vegna fjármagnstekna er í raun verið að segja að um sé að ræða atvinnutekjur en ekki fjármagnstekjur. Þar með gilda almennar reglur um slíka atvinnustarfsemi og um leið fellur hugmyndin um sjálfa sig.

Hugmyndin um að skylda þá sem hafa eingöngu fjármagnstekjur til að reikna sér laun mun einungis flækja skattkerfið okkar ennþá meira - og er það nú nógu flókið fyrir.

Vestfjarðaóður

Mér hefur alltaf þótt vænt um lagið "Vestfjarðaóður" sem bolvíska hljómsveitin KAN sendi frá sér árið 1984. Þegar texti lagsins er skoðaður má sjá lýsingar á því hvernig lífið í þéttbýlinu við Djúp var á þeim tíma, allt séð með augum aðkomumannsins Herberts Guðmundssonar. Textinn við lagið er eitthvað á þessa leið.

Ég bjó á verbúð í Bolungarvík

Þar var nóg um vinnu, blómlegt líf

Við spiluðum um helgar, vítt og breytt

Á Ísafirði og Hnífsdal, Bolungarvík

 

Fjallanna óður seiddi mig

Ég virtist skilja sjálfan mig

Eins og úr fjarskanum segja mér

Því ekki að dvelja lengur hér

 

Fjallanna óður...

 

Þar stundar fólkið böllin af lífi og sál

Og allir skemmta sér, Hallelujah! Skál!

Helgi eftir helgi, eins og ekkert sé

Ég skil ekkert í því, hvar fá menn allt þetta fé?

 

Fjallanna óður...

 

Er þetta ekki það sem okkur Vestfirðinga dreymir um í dag? Við viljum að hér sé næga vinnu að fá og að lífið sé blómlegt.

Vestfjarðanefndin

Það líður að því að nefndin sem skipuð var til að fjalla um leiðir til að styrkja atvinnulíf á Vestfjörðum skili af sér. Nánar til tekið á nefndin að skila tillögum sínum til forsætisráðuneytis fyrir 11. apríl 2007.

Það verður fróðlegt að sjá í hverju tillögur nefndarinnar muni felast, mun nefndin leggja til almennar leiðir til lausnar vandanum eða verður áhersla lögð á sértækar aðgerðir?

Ég vænti þess að vinna nefndarinnar verði árangursrík og eigi eftir að færa okkur Vestfirðingum aukin tækifæri. Það er svo okkar að nýta þau tækifæri okkur til framdráttar.

Íslandshreyfingin

Ég gaf tölvunni frí yfir páskana og tók fjölskylduna fram yfir internetið. Gaf mér þó tíma í kvöld til að taka smá bloggrúnt til að sjá hvað er í umræðunni þessa dagana. Fyrir tilviljun datt ég inn á heimasíðu Íslandshreyfingarinnar og sökum forvitni minnar smellti ég á hnappinn "Þetta viljum við" og þá kom þetta í ljós...

Þetta þykir mér ansi klaufalegt hjá Ómari og félögum, samkvæmt heimasíðunni vilja þau ekki neitt og það kann ekki góðri lukku að stýra hjá nýju framboði.

Það er ekkert grín að vera svín

Í aðdraganda kosninga virðist sem að fólk leggist oft lágt til að reyna að koma höggi á pólitíska andstæðinga sína. Þessi aðferð þekkist bæði í sveitarstjórnarkosningum og í Alþingiskosningum. Þessa dagana má heyra ýmislegt misjafnt um þá stjórnmálaflokka sem bjóða fram til Alþingis í vor. Til dæmis er einn flokkur sakaður um útlendingahatur og stuðningsmönnum annars flokks er líkt við svín sem grillað er á teini. Það er því eins gott að fólk hafi harðan skráp ætli það sér frama í stjórnmálum því hún getur verið óttaleg tík þessi pólitík.

Kastljósið

Lítill fugl hvíslaði því að mér að það yrði bolvískt grjóthrun í Kastljósinu á RÚV í kvöld...

Liverpool á sigurbraut

Sigurganga Liverpool í Meistaradeildinni í fótbolta heldur áfram. Í kvöld voru það liðsmenn PSV Einhoven sem máttu þola 3-0 tap fyrir Liverpool á heimavelli. Mörk Liverpool í leiknum skoruðu þeir Steven Gerrard, John Arne Riise og Peter Crouch. Það er við hæfi að láta mynd af hinum rauðhærða Riise fylgja með þessari færslu.