Ástarhóllinn

Ein af skemmtilegri hugmyndum sem ég hef heyrt undanfarin misseri er ættuð frá skáldinu Trausta úr Vík. Hér er ég auðvitað að vísa til hugmynda hans um "Ástarhólinn" svokallaða. Hér kemur lýsing Trausta á hugmyndinni eins og hún var sett fram í bréfi til aðstandenda Ástarvikunnar í Bolungarvík á sínum tíma: 

"Í tilefni ástarviku langar mig að koma á framfæri hugmynd sem hefur setið í mér síðan ég kyssti fyrstu stúlkuna á skellinöðruárum mínum í Bolungarvík, á síðasta áratug síðustu aldar.

Þannig er mál með vexti, að beint ofan af vitanum á Óshlíðinni, liggur vegaslóði upp á litla náttúrulega syllu í fjallinu.  Þaðan er frábært útsýni yfir allan bæinn, sér í lagi á góðum sumardegi.

Á þessum stað fór ég með stúlkuna áðurnefndu aftan á mótorfák mínum gagngert til að þrýsta vörum mínum upp að hennar.  Hef ég trú á að hinar náttúrulega aðstæður, hin guðdómlega umgjörð, og hið stórbrotna útsýni hafi lagt mun meira á vogarskálarnar heldur en útgeislun mín, sjarmi og persónutöfrar, enda óreyndur með öllu og ungur að árum.  Síðan þá hef ég kysst marga stúlkuna, einmitt sökum útgeislunar, sjarma og persónutöfra auðvitað, en aldrei undir jafn rómantískum og fallegum aðstæðum.

Hugmyndin er einföld og ætti ekki að kosta mikið: 

1. Laga vegaslóðann svo bílar eigi auðvelt með að komast á pallinn.
2. Merkja leiðina fyrir umferð vel og vandlega, (á ensku jafnt sem íslensku) svo ekki fari hún framhjá vegfarendum.
3. Gera útsýnispallinn snyrtilegan og auðveldan bílaumgangi.

Þetta er nú kjarninn í hugmyndinni.  Einnig væri hægt að koma fyrir gestabók, þar sem elskendur gætu jafnvel tjáð tilfinningar sínar með ljóðum eða  öðru slíku. Eflaust væri pólitísk réttsýni að hafa þar smokkasjálfsala, a.m.k. meðan ástarvikan stendur EKKI yfir..."

Hugmyndin um Ástarhólinn er einföld í framkvæmd og er aldrei að vita nema ráðamenn í Bolungarvík taki hana upp á sína arma einhvern daginn.

Fiskistofa til Bolungarvíkur?

Ég skil vel að Hafnfirðingar vilji ekki hafa stórt og ljótt álver í bæjarfélaginu sínu. Mér finnst það líka bera vott um hugrekki að þora að hafna auknum störfum og auknum tekjum bæjarfélagsins af slíkri starfssemi. Í gær kom sem sagt í ljós að það er ekki eftirspurn eftir álveri meðal íbúa Hafnarfjarðar. En framboðið af nýjum álverum virðist vera nægt ef marka má áhyggjur umhverfisverndarsinna. Þá virðist líka vera ljóst að það er eftirspurn eftir álverum hjá íbúum annarra bæjarfélaga á Íslandi. Þar hafa meðal annars verið nefnd bæjarfélögin Húsavík og Reykjanesbær. Eins og á öðrum sviðum hlýtur framboðið að elta eftirspurnina uppi.

Þar sem Hafnfirðingar virðast vera áhugasamir um að kjósa um framtíð einstakra vinnustaða í bæjarfélaginu er ekki úr vegi að velta því fyrir sér hvort Fiskistofa gæti ekki verið næst á dagskrá. Það er þekkt að eitt síðasta verk Hafnfirðingsins Árna M. Mathiesen í starfi sjávarútvegsráðherra hafi verið að flytja höfuðstöðvar Fiskistofu frá Reykjavík til Hafnarfjarðar. Það er ekki víst að allir Hafnfirðingar hafi verið ánægðir með þessa ákvörðun ráðherra - væri þá nokkuð úr vegi að leyfa þeim að kjósa um hvort þeir vilji þessa starfssemi Fiskistofu í bæjarfélaginu? Ef Hafnfirðingar vilja ekki Fiskistofu þá get ég fullvissað ráðamenn um að Bolvíkingar myndu taka við starfsemi Fiskistofu fegins hendi.

En það er líklega ekki hægt að ætlast til að Hafnfirðingar láti frá sér gullmola á borð við Fiskistofu, starfsemi Fiskistofu telst ekki til stóriðju og mengar umhverfið ekkert. Það er nefnilega svoleiðis starfssemi við þurfum til Bolungarvíkur því Vestfirðir hafa jú gefið sig út fyrir að vera stóriðjulaus landshluti. Við Bolvíkingar getum ekki tekið við álveri en við getum tekið við Fiskistofu - og hvar annars staðar en í elstu verstöð landsins ætti Fiskistofa betur heima?

Eins dauði er annars brauð

Hafnfirðingar hafa hafnað nýju deiliskipulagi sem gerði ráð fyrir stækkun álvers í Straumsvík. Aðeins 88 atkvæði skildu að "stríðandi" fylkingar og er það lítið í ljósi þess að tæplega 13 þúsund manns greiddu atkvæði. Sagan segir að íbúar Húsavíkur fagni þessum úrslitum því nú sé alveg ljóst að álver rísi þar í náinni framtíð.

Ég tók ekki afstöðu í þessu innbæjarmáli þeirra Hafnfirðinga en ef ég hefði getað óskað mér einhverrar niðurstöðu úr þessum íbúakosningum þá hefði það verið jafntefli, þ.e. að atkvæði hefðu fallið nákvæmlega jafnt á milli þeirra sem voru fylgjandi og þeirra sem voru á móti. Þá hefðu fulltrúar í bæjarstjórn Hafnarfjarðar líklega fengið að taka ákvörðun í málinu.

Bæjarráðið

Þau tíðindi urðu á fundi bæjarstjórnar Bolungarvíkur að ég var hækkaður í tign í bæjarkerfinu, núna er ég orðinn aðalmaður í bæjaráði. Þau Anna Edvards og Gunnar Halls verða því þess heiðurs aðnjótandi að fá að vinna með mér að bæjarmálunum næstu mánuðina. Ég vænti góðs samstarfs í bæjarráðinu enda verð ég þar að vinna með tveimur fyrrverandi kennurum mínum, Anna kenndi mér íslensku og dönsku í grunnskóla og Gunnar kenndi mér að aka bíl.

ZERO

Af hverju ekki Ísland með... ZERO Vestfirði?

Svarið er augljóst, Ísland væri ljótt og asnalegt án Vestfjarða.

Eliza Wrona

Mér að það sönn ánægja að bjóða upp á Eliza Wrona sem er nýjasta afurð hljómsveitarinnar Grjóthrun í Hólshreppi en sveitin er einmitt aðalnúmerið á rokkhátíðinni Aldrei fór ég suður í ár.

Norðvesturkjördæmi

Norðvesturkjördæmi var á dagskrá í kosningaumfjöllun Stöðvar 2 í kvöld. Þar sátu oddvitar stjórnmálaflokkana í kjördæminu fyrir svörum. Mér fannst þeir ekkert vera að brillera en það kom mér verulega á óvart hve lítið Jón Bjarnason, sem leiðir lista VG, hafði til málanna að leggja. Þegar hann var spurður um leiðir til aukinnar atvinnusköpunar á Vestfjörðum var hann gjörsamlega innistæðulaus. Ef marka má frammistöðu oddvitanna í kvöld gæti ég trúað að bæði Samfylking og Frjálslyndir eigi eftir að auka við sig á kostnað VG. Svo má reyndar ekki gleyma Íslandshreyfingunni, en heyrst hefur að þar á bæ verði kona í 1. sætinu en slíkt gæti verið sterkur leikur hjá þeim þar sem allir hinir oddvitarnir eru karlkyns.

Opinber störf á Vestfjörðum

Í samanburði við aðra landshluta hafa Vestfirðir orðið undir hvað varðar aukningu í opinberum störfum. Það er því eðlilegt að Vestfirðingar krefjist aukinna opinberra starfa í fjórðungnum. Óháð því hvort við teljum að ríkið sé með of mikla eða of litla starfsemi á sínum snærum, verður það að teljast eðlileg krafa okkar að hið opinbera sé jafn virkur þátttakandi í atvinnulífi á Vestfjörðum og það er í öðrum landshlutum. Við erum ekkert að fara fram á að vera tekin fram fyrir aðra íbúa landsins heldur viljum við einungis fá að standa jafnfætis öðrum landsmönnum hvað opinbera starfsemi varðar.

Ég velti því stundum fyrir mér hvaða raddir eiga eftir að heyrast ef að ríkisstjórnin ákveður að fjölga opinberum störfum á Vestfjörðum. Ef ný störf verða búin til fáum við eflaust þá gagnrýni að verið sé að þenja ríkisbáknið út að óþörfu. En ef störf verða flutt frá t.d. höfuðborgarsvæði til Vestfjarða má búast við þeirri gagnrýni að verið sé að taka af einum til að færa öðrum. Við megum alltaf eiga von á einhverri gagnrýni - hvernig sem fer - en við verðum bara láta það sem vind um eyru þjóta. Við erum í fullum rétti að þessu sinni, hvernig sem á málin er litið.

Efling atvinnulífs á Vestfjörðum - Umhverfisstofnun

Fjórða tillaga okkar sjálfstæðismanna til eflingar atvinnulífs á Vestfjörðum snertir starfsemi Umhverfisstofnunar og Náttúrustofu Vestfjarða. Að gefnu tilefni má geta þess að í okkar huga er það algjört lykilatriði að þær hugmyndir sem fram koma í þeirri vinnu sem nú fer fram á vegum nefndar um eflingu atvinnulífs á Vestfjörðum nýtist ekki eingöngu byggðinni í Skutulsfirði, heldur komi einnig til góða byggðarlögunum í kring.

"Nú stefnir í að Vestfirðir verði eini landshlutinn þar sem ekki verður rekin stóriðja.  Vestfirðir hafa verið að marka sér sérstöðu sem svæði með ósnortna náttúru.   Í 1. gr. laga nr. 90/2002 um Umhverfisstofnun segir:  "Ríkið starfrækir stofnun sem nefnist Umhverfisstofnun. Stofnunin hefur aðsetur á höfuðborgarsvæðinu en getur rekið hluta af starfsemi sinni annars staðar á landinu."

Eðlilegt væri því að skoða hvort ákveðnir þættir í starfsemi Umhverfisstofnunar (UST) ættu ekki heima á Vestfjörðum.    Hér verða ekki talin upp öll þau verkefni sem gætu verið unnin jafnvel í deild á vegum UST á Vestfjörðum.  Í þessu sambandi má þó nefna sem dæmi verkefni sem tengjast náttúruvernd, verkefni tengd friðlöndum og þjóðgörðum landsins.  Benda má á að í Bolungarvík er starfrækt Náttúrustofa Vestfjarða, sem hefur verið á forræði Bolungarvíkurkaupstaðar en er nú að verða samstarfsverkefni sveitarfélaganna á norðanverðum Vestfjörðum.  Þar hafa m.a. verið unnin ýmis verkefni sem lúta að mati á umhverfisáhrifum og rannsóknarvinnu hverskonar svo eitthvað sé nefnt.  Því mætti kanna hvort Náttúrustofa Vestfjarða gæti sinnt þessum verkefnum til viðbótar ákveðnum þáttum í starfsemi UST."

Efling atvinnulífs á Vestfjörðum - Verkefni Ríkisendurskoðunar

Þriðja tillagan okkar til eflingar atvinnulífs á Vestfjörðum tengist verkefnum Ríkisendurskoðunar og er svohljóðandi:

"Í dag sinnir Ríkisendurskoðun ýmsum verkefnum fyrir opinberar stofnanir, jafnt á höfuðborgarsvæðinu sem á landsbyggðinni.  Mörg þessara verkefna gætu auðveldlega verið unnin af einkaaðilum sem gætu sérhæft sig í ákveðnum málaflokkum.

Hægt væri að taka þá stefnumarkandi ákvörðun að jafnan yrði leitað fyrst til aðila utan Reykjavíkursvæðisins með slík verkefni.  Sem dæmi má nefna að á norðanverðum Vestfjörðum eru nú starfandi þrjár endurskoðunarstofur.  Rétt er að benda á að eitt vinsælasta námið í fjarnámi frá Vestfjörðum hefur einmitt verið nám í viðskipta- og rekstrarfræðum og eru því margir á svæðinu með slíka menntun."