Efling atvinnulífs á Vestfjörðum - Umhverfisstofnun

Fjórða tillaga okkar sjálfstæðismanna til eflingar atvinnulífs á Vestfjörðum snertir starfsemi Umhverfisstofnunar og Náttúrustofu Vestfjarða. Að gefnu tilefni má geta þess að í okkar huga er það algjört lykilatriði að þær hugmyndir sem fram koma í þeirri vinnu sem nú fer fram á vegum nefndar um eflingu atvinnulífs á Vestfjörðum nýtist ekki eingöngu byggðinni í Skutulsfirði, heldur komi einnig til góða byggðarlögunum í kring.

"Nú stefnir í að Vestfirðir verði eini landshlutinn þar sem ekki verður rekin stóriðja.  Vestfirðir hafa verið að marka sér sérstöðu sem svæði með ósnortna náttúru.   Í 1. gr. laga nr. 90/2002 um Umhverfisstofnun segir:  "Ríkið starfrækir stofnun sem nefnist Umhverfisstofnun. Stofnunin hefur aðsetur á höfuðborgarsvæðinu en getur rekið hluta af starfsemi sinni annars staðar á landinu."

Eðlilegt væri því að skoða hvort ákveðnir þættir í starfsemi Umhverfisstofnunar (UST) ættu ekki heima á Vestfjörðum.    Hér verða ekki talin upp öll þau verkefni sem gætu verið unnin jafnvel í deild á vegum UST á Vestfjörðum.  Í þessu sambandi má þó nefna sem dæmi verkefni sem tengjast náttúruvernd, verkefni tengd friðlöndum og þjóðgörðum landsins.  Benda má á að í Bolungarvík er starfrækt Náttúrustofa Vestfjarða, sem hefur verið á forræði Bolungarvíkurkaupstaðar en er nú að verða samstarfsverkefni sveitarfélaganna á norðanverðum Vestfjörðum.  Þar hafa m.a. verið unnin ýmis verkefni sem lúta að mati á umhverfisáhrifum og rannsóknarvinnu hverskonar svo eitthvað sé nefnt.  Því mætti kanna hvort Náttúrustofa Vestfjarða gæti sinnt þessum verkefnum til viðbótar ákveðnum þáttum í starfsemi UST."

Athugasemdir

[Hlynur Þór Magnússon, 28.3.2007 kl. 00:08]

Spyrja mætti: Hvers vegna skal Umhverfisstofnun hafa aðsetur á höfuðborgarsvæðinu?

[Baldur Smári Einarsson, 28.3.2007 kl. 01:05]

Mjög góð spurning, þar er í raun sérstakt að það sé bundið í lögum hvar skrifstofur einstakra ríkisstofnana skuli vera staðsettar.