Efling atvinnulífs á Vestfjörðum - Þyrlusveit Landhelgisgæslunnar

Önnur tillaga okkar sjálfstæðismanna í bæjarstjórn Bolungarvíkur til eflingar atvinnulífs á Vestfjörðum tekur á verkefnum þyrlusveitar Landhelgisgæslunnar og er á þessa leið:

"Verkefni þyrlusveitar Landhelgisgæslunnar dreifast á landið og miðin og eru kannski síst bundin þéttbýlinu á suðvesturhorni landsins.  Það er því eðlilegt að horft sé til þess að staðsetning þyrlusveitarinnar sé ekki bundin við Reykjavík eingöngu.  Auðvelt er að sína fram á að meðalferðatími á slysstað styttist ef þyrlur eru staðsettar á fleiri stöðum á landinu.

Það sem mælir með því sérstaklega að staðsetja þyrlu á Vestfjörðum eru þættir eins og nálægð við fiskimið, þar sem stór floti stundar reglulega veiðar.  Þá er ljóst að erfiðar samgöngur á Vestfjörðum á landi og tímafrekar samgöngur á sjó mæla með því að í neyð séu samgöngur í lofti meira nýttar en nú er t.d. fyrir sjúkraflug frá sunnanverðum Vestfjörðum til Ísafjarðar.  Í raun má ætla að staðsetning þyrlu á Ísafirði gæti orðið til þess að annað sjúkraflug en með þyrlu væri óþarft fyrir Vestfirði, þar sem þyrlan getur jafnan athafnað sig betur við erfiðar aðstæður en sjúkraflugvél.  Augljóst er að eftir sameiningu lögregluumdæma á Vestfjörðum þá getur verið af því hagræði að hægt sé með skömmum fyrirvara að færa til lögreglumenn eða koma þeim á vettvang á hvoru svæðinu sem er, án þess að aka þurfi um ríflega 600 km langan veg.  Það sama gildir um hjálparsveitir á Vestfjörðum sem hafa átt farsælt samstarf við Landhelgisgæsluna.

Reikna má með að um gæti verið að ræða allt að 15 störf sem tengdust því að hafa eina þyrlu staðsetta á Ísafjarðarflugvelli.  Þá má nefna að á Ísafirði er stórt og mikið flugskýli sem að öllum líkindum myndi henta starfseminni vel.

Störf tengd staðsetningu þyrlu á Vestfjörðum gætu að nokkru leyti komið í stað þeirrar fækkunar á störfum sem orðin er vegna minnkandi umsvifa Ratsjárstofnunar."

Efling atvinnulífs á Vestfjörðum - Skattstofan

Á fundi í bæjarráði Bolungarvíkur í morgun kynnti ég tillögur sem aðal- og varabæjarfulltrúar D-listans í bæjarstjórn Bolungarvíkur hafa sent inn til nefndar um eflingu atvinnulífs á Vestfjörðum. Tillögurnar sem um ræðir eru viðbót við áður framkomnar hugmyndir sem settar voru fram sameiginlega af forráðamönnum sveitarfélaga á Vestfjörðum nýverið og fleiri góðar tillögur sem fram hafa komið í fjölmiðlum.

Fyrsta tillagan snertir eflingu Skattstofunnar í Vestfjarðaumdæmi og er svohljóðandi:

"Skattstjórinn í Vestfjarðaumdæmi (SV), er stofnun sem vinnur úr skattframtölum einstaklinga og fyrirtækja á Vestfjörðum.  Ætla verður að þar sé unnið eftir sömu lögum og reglum og annarsstaðar á landinu.  Þar er því til staðar þekking til að vinna úr framtölum hvaðan sem er á landinu.

Því er lagt til að Skattstofan í Vestfjarðaumdæmi taki að sér aukin verkefni.  Verkefnin verði færð frá Skattstjóranum í Reykjavík (SR).  Stefnt verði að því að strax á þessu ári verði verkefni SV tvöfölduð að umfangi og starfsmönnum fjölgað í samræmi við það.  Á næstu fjórum árum verði stefnt að því að færa alla vinnu vegna skattframtala einstaklinga frá SR til SV.

Ef upp koma hugmyndir um að gera landið að einu skattaumdæmi og vinna öll skattframtöl á einum stað, þá verði sú starfsemi höfð á Ísafirði og í nágrenni.

Ljóst má vera að þetta þýðir breytingar fyrir starfsmenn SR og því nauðsynlegt að huga að því að þeir gangi fyrir í önnur störf sem stofnað er til á vegum ríkisins í Reykjavík.  Það mun þó auðvelda tilfærsluna að skv. könnun Samtaka atvinnulífsins þá er starfsmannavelta í opinbera geiranum nálægt 10% á ári.

Slík starfsemi gæti stutt við væntanlegan Háskóla Vestfjarða á Ísafirði, þar sem vel mætti hugsa sér að koma á fót námi í skattarétti.  Starfsmenn gætu þar með átt þátt í að byggja upp það nám við væntanlegan Háskóla Vestfjarða.

Vissulega fylgir því kostnaður að færa til verkefni.  Á það ber þó að líta að við slíkan flutning losnar húsnæði á dýrasta svæði á Íslandi.  Sala á slíku húsnæði gæti því greitt kostnað við flutninginn og jafnvel meira til."

Draumastarfið

Atvinnumálin eru mér hugleikin þessa dagana. Af því tilefni datt mér í hug að leggja fyrir ykkur einfalda spurningu sem ég hvet ykkur til að svara með kommenti.

Við hvað vildir þú helst af öllu starfa - hvert er þitt draumastarf?

Bolvíkingar án enska boltans næsta vetur?

Samkvæmt heimildum Mannlífs verður enski boltinn ekki á Sýn næsta vetur heldur verður stofnuð ný sjónvarpsstöð um sýningar frá enska boltanum. Líklegt er að sú sjónvarpsstöð spanni a.m.k. 5 útsendingarrásir líkt og Skjásport gerir í dag til að geta sent út alla laugardagsleikina í beinni útsendingu. Samkvæmt heimildum mínum gæti þetta þýtt að útsendingar frá enska boltanum náist ekki í Bolungarvík næsta haust þar sem sendir Digital Ísland á staðnum ræður ekki við þessa fjölgun útsendingarrása. Það sama gæti átt við í öðrum bæjarfélögum þar sem Digital Ísland sendir út á UHF-tíðni.

Það þó ekki víst að bolvískir fótboltafíklar þurfi að vera svartsýnir vegna útsendinga enska boltans næsta vetur því það mun vera hægt að leysa málið á einfaldan hátt. Það er hægt að þrýsta á um að Digital Ísland setji upp annan sendi til að geta annað útsendingunum líkt og gert hefur verið (eða er fyrirhugað) á Ísafirði og Hnífsdal. Auk þessa gæti ADSL-sjónvarpskerfi Símans hugsanlega komið útsendingum enska boltans til væntanlegra áskrifenda.

Bolvíkingar eru þekktir fyrir að bregðast við breyttum aðstæðum og sannaðist það rækilega þegar SkjárEinn keypti sýningarréttinn að enska boltanum á sínum tíma. Það vakti þjóðarathygli þegar við söfnuðum peningum meðal íbúa bæjarins til að geta kostað uppsetningu sjónvarpssendis. Kannski þurfum við að endurtaka leikinn í ár.

Óháð því hvort Bolvíkingar hafa möguleika á að sjá enska boltann næsta vetur er nokkuð ljóst að það mun þurfa að greiða áskrift að nýju sjónvarpsstöðinni, spurningin er bara hve dýr sú áskrift verður.

Víkari.is

Ég er búinn að halda úti bolvíska fréttavefnum www.vikari.is í rúmlega 4 ár. Ég hugsa að fáir geri sér grein fyrir hve mikil vinna liggur á bakvið vefinn en lauslega má ætla að það sé að jafnaði 1 klukkutími á dag, alla daga ársins. Að mínu mati hefur þessum tíma hingað til verið vel varið og á þessum 4 árum hafa Bolvíkingar nær og fjær sem og aðrir netverjar getað fylgst með helstu fréttum úr Víkinni.

Í dag urðu ánægjuleg tímamót í sögu Víkari.is þegar ég réði mér starfsmann til að sjá um fréttaskrif. Þar er þungu fargi af mér létt. Frá og með deginum í dag mun Ragna Jóhanna Magnúsdóttir gegna starfi fréttastjóra á Víkari.is. Ég býð Rögnu velkomna til starfa og ég efast ekki um að samstarf á okkar á þessum vettvangi á eftir að verða farsælt. Þetta er þó ekki eini samstarfsvettvangur okkar Rögnu því eins og flestir vita erum við 2/3 hluti minnihluta bæjarstjórnar Bolungarvíkur.

Íbúaþróun á Vestfjörðum 1901-2006

Fyrir sex árum síðan var ég að skrifa lokaritgerðina mína í viðskiptafræðinni í Háskóla Íslands. Ritgerðin fjallaði um smábátaútgerð á Vestfjörðum og var einn kafli hennar tileinkaður búsetuþróun á Vestfjörðum. Í tengslum við þau skrif safnaði ég ýmsum upplýsingum um íbúaþróun á svæðinu. Sumar þessara upplýsinga hef ég uppfært til dagsins í dag. Það þjónar í sjálfu sér engum sérstökum tilgangi að setja þessar tölur hér fram en ef til verða þær einhverjum til gagns og gamans.

Íbúaþróun á Vestfjörðum 1901-2006

Ár	Fjöldi íbúa	Hlutfall af íbúum landsins
1901	12.447	15,86%
1910	13.386	15,71%
1920	13.397	14,15%
1930	13.071	12,01%
1940	12.953	10,66%
1950	11.166	7,76%
1960	10.507	5,93%
1970	10.050	4,91%
1980	10.479	4,57%
1990	9.798	3,83%
2000	8.150	2,88%
2006	7.470	2,43%

Taflan hér að ofan ætti að skýra sig að mestu leyti sjálf, ártal er í fyrsta dálkinum því næst kemur mannfjöldi í lok viðkomandi árs og síðasti dálkurinn sýnir hlutfall Vestfirðinga af heildarfjölda íbúa landsins, þ.e. íbúafjöldi á Vestfjörðum deilt með íbúafjölda á Íslandi.

Breytingar á fjölda íbúa á Vestfjörðum 1901-2006

Tímabil	Breyting á tímabili	Hlutfallsleg breyting
1901-1910	939	7,54%
1910-1920	11	0,08%
1920-1930	-326	-2,43%
1930-1940	-118	-0,90%
1940-1950	-1.787	-13,80%
1950-1960	-659	-5,90%
1960-1970	-457	-4,35%
1970-1980	429	4,27%
1980-1990	-681	-6,50%
1990-2000	-1.648	-16,82%
2000-2006	-680	-8,34%

Í töflunni hér að ofan er tekin út breyting á íbúafjölda á Vestfjörðum yfir gefin tímabil. Þar má sjá að Vestfirðingum fjölgar fyrstu tvo áratugi 20. aldar en svo fer að halla undan fæti og á 5. áratugnum fækkar íbúum fjórðungsins verulega eða að jafnaði um nærri 180 manns á ári. Næstu tvo áratugi heldur Vestfirðingum áfram að fækka en aðeins hægar en á 5. áratugnum. Á 8. áratugnum var mikil uppsveifla í sjávarþorpum Vestfjarða og skilaði það sér í fólksfjölgun milli áranna 1970 og 1980. En síðan þá hefur íbúum Vestfjarðakjálkans fækkað verulega, 10. áratugurinn var sérstaklega slæmur en þá fækkaði Vestfirðingum um tæp 17%. Frá árinu 2000 hefur hins vegar hægt á fækkuninni en við viljum auðvitað snúa þessari þróun við og fara að sjá jákvæðar tölur á 21. öldinni.

Samantektin hér að ofan byggist á á bláköldum staðreyndum, þetta er fortíð sem við getum ekki flúið. Verkefni okkar er hins vegar að sjá til þess að framtíðin verði á öðrum og jákvæðari nótum.

Nafnleysi

Á nýja www.bb.is vefnum gefst lesendum tækifæri til að segja skoðun sína á fréttum og greinum. Þessi möguleiki getur verið skemmtilegur en því miður er hætt við að nafnlaus leiðindaskrif skemmi fyrir eins og þetta dæmi sannar.

Byggðamál

Byggðamál hafa verið fyrirferðarmikil í umræðunni hér á Vestfjörðum að undanförnu. Þessi umræða er eðlileg enda hefur íbúaþróun á Vestfjörðum verið neikvæð undanfarin ár. Í hinum ýmsu skýrslum hafa verið nefndar mögulegar ástæður þessarar þróunar og sýnist þá sitt hverjum. Margir kenna kvótakerfinu og ríkisstjórnum síðustu ára um slæma stöðu Vestfjarða en aðrir telja að þróunin sé aðeins hluti af almennum breytingum á atvinnuháttum landsmanna, þ.e.a.s. breytingum úr frumvinnslu yfir í úrvinnslu og þjónustu. Fleiri áhrifaþættir hafa einnig verið nefndir sem ástæður búsetuþróunar síðustu ára en það er of langt mál að fara út í þá þætti að þessu sinni.

Við Vestfirðingar eigum okkur sameiginlegt markmið, við viljum treysta byggð á Vestfjörðum. Okkur getur þó greint á um hvaða leiðir við viljum fara til að ná markmiðinu. Ég vil leita nýrra leiða til að ná þessu markmiði, þar er þörf á nýrri hugsun – við þurfum að nálgast viðfangsefnin frá öðrum sjónarhornum en áður.

Við megum ekki einblína of mikið á fortíðina ef við ætlum að breyta þróun mála hér á Vestfjörðum. Það er ekki víst að í orsökum fólksfækkunar felist lausnir sem leiða til fólksfjölgunar. Sumir halda því fram að hægt sé að leysa megi vanda Vestfjarða að hluta til með auknum byggðakvóta í stað þeirra aflaheimilda sem seldar hafa verið af svæðinu. Ég trúi ekki á slíkar lausnir og vísa þar meðal annars til reynslu okkar Bolvíkinga af kvótamálum. Héðan fór kvótinn og fólki fækkaði, hingað var keyptur kvóti en fólki hélt áfram að fækka.

Það kannast líklega flestir við þær raddir að útgjöldum ríkisins eigi að skipta niður á svæði miðað við höfðatölu. Það ætti engum að koma á óvart að slíkar raddir koma yfirleitt frá þéttbýlasta svæði landsins. Á sama tíma vill enginn kannast við að skipta beri tekjum ríkisins eftir sama mælikvarða. Það væri til dæmis fróðlegt að sjá hve miklu Vestfirðingar hafa skilað til samfélagsins í gegnum tíðina, ég hugsa að við getum borið höfuðið hátt í þeim efnum. Slíkir talnaleikir skila okkur að öllum líkindum réttlætingu á því að hið opinbera eigi að verja ákveðnum hluta hinnar svokölluðu samneyslu innan Vestfjarðakjálkans. Það er svo alltaf spurning hve stór sá hluti eigi að vera. Aftur á móti er það eðlileg krafa okkar að ríkið sé jafn virkur þátttakandi í atvinnulífi á Vestfjörðum og það er í öðrum landshlutum. Á grundvelli þessa ætti engan að undra að við förum fram á fjölgun opinberra starfa á Vestfjörðum.

Það er af mörgu að taka þegar umræða um byggðamál og Vestfirði er annars vegar, atriðin hér að ofan eru aðeins hluti þess sem ég hef fram að færa í þessum efnum. Ég læt þetta hins vegar nægja að sinni en get lofað að ég hef ekki sagt mitt síðasta orð um byggðamál.

Bolvískar skjámyndir

Ég á ansi margar myndir frá Bolungarvík í safni mínu. Í myndasafninu "skjámyndir" má finna fjórar myndir sem hægt er að nota sem skjámyndir. Ég set inn fleiri myndir síðar ef áhugi fyrir hendi.

Örnefnasögur - Snjólfsgjá

Tveir menn voru á ferð í hríðarveðri á Skálavíkurheiði. Villtust þeir þar og lentu upp á Heiðarfjall. Fóru þeir lengi inn eftir fjallinu, en vissu ekki hvar þeir fóru. Loks komu þeir þar að er gil eitt mikið gekk niður frá fjallsbrúninni. Ræddu þeir nú hvort þeir skyldu freista þess að fara niður gilið, eða leita annars niðurgöngu, en kom ekki saman um hvað gera skyldi. Annar þeirra, sem Snjólfur er nefndur sagði þá: "Öll gil liggja niður". Settist hann svo á staf sinn á gilbrúninni og renndi sér niður. Kom hann niður og bjargaðist til byggða. Félagi hans, sem ekki vildi fylgja honum eftir, kom aldrei fram. Gil þetta heitir síðan Snjólfsgjá og er spölkorn fyrir innan Grjótleiti á Stigahlíð.