Bæjarmálin

Á heimasíðu Bolungarvíkurkaupstaðar má sjá lista yfir nýjustu fundirgerðir nefnda á vegum bæjarfélagsins. Frá því 27. mars síðastliðinn hafa 7 fundir komist þar á blað og sat ég 6 þeirra, 4 fundi bæjaráðs og sinn fundinn hvor hjá umhverfismálaráði og bæjarstjórn. Einhver gæti haldið að þettta væri merki um að ég væri áhrifamikill innan stjórnkerfis bæjarins en að mínu mati er þetta einungis merki um að lítið sé um fundarhöld hjá öðrum nefndum bæjarins.

Hér að neðan má sjá hvenær síðasti skráður fundur er hjá einstökum nefndum og ráðum.

• Atvinnumálaráð: 6. mars 2007
• Bæjarráð: 17. apríl 2007
• Bæjarstjórn: 29. mars 2007
• Félagsmálaráð: 26. febrúar 2007
• Fræðslumálaráð: 28. febrúar 2007
• Hafnarstjórn: 27. mars 2007
• Húsnæðisnefnd: 10. janúar 2007
• Íþrótta- og æskulýðsráð: 23. janúar 2007
• Landbúnaðarnefnd: 24. janúar 2007
• Menningarráð: 22. mars 2007
• Umhverfismálaráð: 10. apríl 2007

Það er einnig greinilegt að sumar nefndir á vegum bæjarfélagsins funda sjaldan. Það vekur upp þá spurningu hvort ekki sé rétt að fækka nefndum innan bæjarkerfisins. Til gamans má geta þess að um 5% íbúa Bolungarvíkur eru aðalmenn í nefndum og ráðum á vegum bæjarfélagins. Það er ótrúlega hátt hlutfall og jafngildir því að ég Reykjavík sæti nærri 6 þúsund manns í nefndum og ráðum á vegum borgarinnar.

Víkari vikunnar

Að undanförnu hefur www.vikari.is tekið ákveðnum efnislegum breytingum. Eftir að ég réð Rögnu, Vert í Kjallaranum, til starfa við vefinn hefur mér gefist tækifæri til að láta nokkra af upphaflegu draumunum mínum rætast. Einn þeirra var að byrja með dagskrárliðinn "Víkari vikunnar" þar sem Víkarar - nær og fjær - eru spurðir nokkurra léttra spurninga. Víkari þessarar viku er Magnús Már Einarsson en á undan honum hafa Katrín Gunnarsdóttir, Finnbogi Sveinbjörnsson og Jens Þór Sigurðarson verið þess heiðurs aðnjótandi að vera "Víkari vikunnar". Ég vona að þessi nýbreytni falli lesendum www.vikari.is vel í geð en til gamans má geta þess að yfir 600 manns heimsækja vefinn dag hvern.

Ég á afmæli í dag

Það er komið sumar - samkvæmt dagatalinu. Þessi 31. afmælisdagur minn er þó ekkert sérstaklega sumarlegur, allt er orðið hvítt og norðaustanáttin í kaldara og hvassara lagi. Kuldalegt veðrið fékk mig til að kúra aðeins fram á morguninn en að lokum dreif ég mig á fætur til að geta tekist á við verkefni dagsins.

Afmælisdagurinn minn virðist alltaf hitta á annasaman tíma hjá mér, á skólaárunum var próflestur í hámarki í kringum 21. apríl en eftir að við tók nám í skóla lífsins hefur ætíð verið álagspunktur í vinnunni hjá mér á vorin. Það verður því líkt og áður lítið um hátíðarhöld hjá mér í tilefni afmælisdagsins. Á dagskránni í dag er þó fótbolti og matur hjá mömmu.

Ásgeir Þór á líka afmæli í dag, ég óska honum innilega til hamingju með fertugsafmælið.

Vestfirskir sleikipinnar

Mér til mikillar ánægju hefur vefsvæði Vestfirskra sleikipinna loksins verið uppfært. Nýjasta færslan fjallar um mögulega aðkomu tveggja bolvískra fastagesta skemmtistaðarins Pravda að brunanum mikla í miðborg Reykjavíkur í gær.

Föstudagurinn þrettándi

Hjátrúarfullir einstaklingar eiga það til að óttast föstudaga sem bera upp á þrettánda dag mánaðarins. Slíkur dagur er einmitt í dag. Margir sýna sérstaka aðgát á þessum degi og hafa jafnvel heyrst sögur af fólki sem fer ekki út úr húsi á föstudaginn þrettánda. Ég er mátulega hjátrúarfullur og vona að óheppnin elti aðra en mig í dag.

Íslenska 103

Hvað ætli það séu margar stafsetningarvillur/málfræðivillur í þessari frétt sem birtist á Vísi.is fyrr í kvöld?

"Vísir, 12. apr. 2007 20:28

Eldur kom upp í bát

Kviknaði í bát suðvestur af Ryti við Ísafjarðardjúpi rétt um kvöldmataleitið í kvöld. Tveir menn voru í bátnum. Að sögn vaðstjóra á Ísafirði náðu mennirnir að slökkva eldinn, en báturinn varð vélvana og þurfti því að kalla á hjálp. Sædísin frá Bolungavík kom á staðin og er báturinn væntanlegur til hafnar í Bolungavík um klukkan hálf tíu. Upptök eldsins eru ókunn."

Ég átti hreinlega í erfiðleikum með að lesa mig í gegnum fréttina.

Kosningar

Vinsældir www.vikari.is hafa verið að aukast undanfarið og þykir vefurinn nógu álitlegur til að stjórnmálaflokkar vilji auglýsa þar. Ég græt það ekki enda byggist rekstrargrundvöllur www.vikari.is núorðið á auglýsingasölu. Það er svo spurning hvort aðrir flokkar fylgi í kjölfar Sjálfstæðisflokksins.

Auðveldara að eyða en afla

Afi heimsækir mig reglulega í vinnuna og oftar en ekki ræðum við veðurfarið og aflabrögðin hér í Víkinni. Í dag barst talið hins vegar að bæjarmálunum. Afi var í hreppsnefnd Hólshrepps á sínum tíma og hefur því eðlilega mikinn áhuga á málefnum sveitarfélagsins. Gamli maðurinn sagði mér frá fundi sem hann hafði nýlega setið þar sem til umfjöllunar voru tillögur um endurbætur á íbúðum aldraðra hér í bæ.

Þar sem bág fjárhagsstaða Bolungarvíkurkaupstaðar hefur verið mikið rædd í fjölmiðlum að undanförnum vissi afi að það væru litlir sem engir peningar í bæjarkassanum. Því spurði hann hvort það væri til einhverjir fjármunir til að ráðast í framkvæmd sem þessa. Ég veit ekki nákvæmlega hvaða svör afi fékk við þessari spurningu en hann upplýsti mig um að í gamla daga hefðu menn alltaf þurft að vera búnir að afla peninganna áður en þeim var eytt. Ég las það einnig út úr frásögn afa að nú í dag ætti fyrst að framkvæma en svo síðar meir ætti að reyna að fá styrki til að fjármagna verkin. Þetta var nokkuð sem gamli maðurinn átti erfitt með að skilja.

Afi kvaddi mig með þeim orðum að ég ætti að muna það væri mikið auðveldara að eyða peningum en að afla þeirra.

Þessi orð ættum við öll að hafa í huga þegar við stöndum frammi fyrir ákvörðunum sem snerta fjárhag okkar.

Kastljósið

Lítill fugl hvíslaði því að mér að það yrði bolvískt grjóthrun í Kastljósinu á RÚV í kvöld...

Ástarhóllinn

Ein af skemmtilegri hugmyndum sem ég hef heyrt undanfarin misseri er ættuð frá skáldinu Trausta úr Vík. Hér er ég auðvitað að vísa til hugmynda hans um "Ástarhólinn" svokallaða. Hér kemur lýsing Trausta á hugmyndinni eins og hún var sett fram í bréfi til aðstandenda Ástarvikunnar í Bolungarvík á sínum tíma: 

"Í tilefni ástarviku langar mig að koma á framfæri hugmynd sem hefur setið í mér síðan ég kyssti fyrstu stúlkuna á skellinöðruárum mínum í Bolungarvík, á síðasta áratug síðustu aldar.

Þannig er mál með vexti, að beint ofan af vitanum á Óshlíðinni, liggur vegaslóði upp á litla náttúrulega syllu í fjallinu.  Þaðan er frábært útsýni yfir allan bæinn, sér í lagi á góðum sumardegi.

Á þessum stað fór ég með stúlkuna áðurnefndu aftan á mótorfák mínum gagngert til að þrýsta vörum mínum upp að hennar.  Hef ég trú á að hinar náttúrulega aðstæður, hin guðdómlega umgjörð, og hið stórbrotna útsýni hafi lagt mun meira á vogarskálarnar heldur en útgeislun mín, sjarmi og persónutöfrar, enda óreyndur með öllu og ungur að árum.  Síðan þá hef ég kysst marga stúlkuna, einmitt sökum útgeislunar, sjarma og persónutöfra auðvitað, en aldrei undir jafn rómantískum og fallegum aðstæðum.

Hugmyndin er einföld og ætti ekki að kosta mikið: 

1. Laga vegaslóðann svo bílar eigi auðvelt með að komast á pallinn.
2. Merkja leiðina fyrir umferð vel og vandlega, (á ensku jafnt sem íslensku) svo ekki fari hún framhjá vegfarendum.
3. Gera útsýnispallinn snyrtilegan og auðveldan bílaumgangi.

Þetta er nú kjarninn í hugmyndinni.  Einnig væri hægt að koma fyrir gestabók, þar sem elskendur gætu jafnvel tjáð tilfinningar sínar með ljóðum eða  öðru slíku. Eflaust væri pólitísk réttsýni að hafa þar smokkasjálfsala, a.m.k. meðan ástarvikan stendur EKKI yfir..."

Hugmyndin um Ástarhólinn er einföld í framkvæmd og er aldrei að vita nema ráðamenn í Bolungarvík taki hana upp á sína arma einhvern daginn.