Hann bjó á verbúð í Bolungarvík

"Bubbi Morthens mun leita að söngvara fyrir í hljómsveit sína í Bolungarvík í raunveruleikaþættinum Bandið hans Bubba sem hefur göngu sína á Stöð 2 í vetur. Fyrstu áheyrnarprufurnar fara fram í Bolungarvík 10. október... Bubbi verður sjálfur viðstaddur allar prufurnar. Sérstakir útsendarar hafa síðan verið gerðir út af örkinni til að finna hæfileikafólk sem aldrei myndi láta sjá sig í svona þætti og hyggst Bubbi sækja það, prívat og persónulega...Bubba líst vel á þáttinn og það verður til mikils að vinna, þrjár milljónir í reiðufé auk plötusamnings."

Bubbi bjó á verbúð í Bolungarvík á sínum yngri árum. Nú leitar hann í Víkina fögru í von um að finna þar söngvara í hljómsveitina sína. Ég vona að leitin beri góðan árangur.

Kvíði

Klukkan fjögur í dag á að kynna mótvægisaðgerðir ríkisstjórnarinnar vegna skerðingar á þorskkvóta. Ég verð að viðurkenna að ég er svolítið kvíðinn. Ég óttast að þær aðgerðir sem verða kynntar til sögunnar eigi ekki eftir að gagnast þeim byggðarlögum sem skerðingin bitnar harðast á. Með öðrum orðum, ég óttast að sum byggðarlög hagnist á óförum annarra. Ég tek undir með þeim sem telja að stjórnvöld séu veruleikafirrt ef þau horfa ekki fyrst og fremst til þeirra byggðarlaga sem byggja afkomu sína á þorskveiðum og vinnslu þegar kemur að mótvægisaðgerðunum. Kannski er þetta bara slæmur dagur hjá mér í dag en reynslan hefur kennt mér að við svona aðstæður sé best að vona það besta en búast við því versta.

Háskóli hafsins

Háskólasetur Vestfjarða færðist nú um helgina skrefi nær því markmiði sínu að verða Háskóli hafsins samkvæmt frétt á bb.is. Háskóli hafsins hljómar vel í mínum eyrum.

Háskólinn okkar

Þau gleðilegu tíðindi bárust mér í dag að Fjórðungsþing Vestfirðinga hafi nú um helgina samþykkt að stofna háskóla á Vestfjörðum árið 2008. Eitt ár er fljótt að líða og því er því ekki seinna vænna að hefja undirbúning þessa framfaramáls okkar Vestfirðinga.

Eitt af því fyrsta sem við þurfum að hugsa um er hvað á að kenna í skólanum, eiginlega er það grundvallaratriði. Verður þetta frumgreinaskóli eða ætlum við að sérhæfa okkur á einhverju sviði? Ein af þeim hugmyndum sem hafa komið fram er að háskólinn muni sérhæfa sig í málefnum hafsins.

Annað sem kemur upp í hugann er nafngiftin, ætla menn að kalla þetta Háskóla Vestfjarða eða eru til einhverjar betri hugmyndir? Ég tel það góða hugmynd að efna til samkeppni um nafn á háskóla á Vestfjörðum.

Án þess að telja upp allt sem hugsast getur þá þarf líklega að velja háskólanum stað. Sumir segja að Ísafjöður sé sjálfgefinn, aðrir tala um stór-Ísafjarðarsvæðið en varla er hægt að útiloka neina staðsetningu að svo stöddu.

Hvað sem öllum vangaveltum líður þá er það gott mál að búið sé samþykkja að stofna háskóla á Vestfjörðum. Nú er bara að láta verkin tala.

Má stytta fundi bæjarstjórnar?

Bæjarfulltrúi á Ísafirði spyr nú þessarar spurningar eftir að fundur bæjarstjórnar Ísafjarðarbæjar stóð yfir í rúmar 7 klukkustundur. Bæjarstjórnarfundir eiga að vera afgreiðslufundur, þ.e.a.s. þar eru afgreiddar fundargerðir nefnda og ráða á vegum bæjarfélagsins og því eiga ekki að skapast þar langar umræður. Þó geta verið á dagskrá sérstök mál sem umdeild eru í bæjarfélaginu og þarfnast víðtækrar umræðu. En í jafn litlu bæjarfélagi og Ísafjarðarbæ ættu þau að vera fá. Að fenginni reynslu eru þær ráðleggingar sem ég get gefið ísfirskum bæjarfulltrúum við þessar aðstæður ósköp einfaldar, verið stuttorð og kjarnyrt. Það gerir gæfumuninn.

Sparisjóðir sameinast

Undanfarið hafa borist fréttir af sameiningum sparisjóða og nú síðast greinir fréttavefurinn Visir.is frá því að Sparisjóður Vestfirðinga og Sparisjóður Húnaþings og Stranda hafi í hyggju að sameinast Sparisjóði Keflavíkur. Það verður fróðlegt að fylgast með þróun mála næstu vikurnar en það virðist sem sparisjóðum á Íslandi muni fækka og þeir stækka á næstu misserum.

Ársskýrsla ársins

Á morgun verða veitt verðlaun fyrir ársskýrslu ársins og eru þátttakendur í þessari samkeppni hlutafélög sem skráð eru í OMX Nordic Exchange kauphöllina á Íslandi. Ársskýrslur fyrirtækja hafa að geyma ársreikninga fyrirtækjanna auk ýmissa upplýsinga um rekstur þeirra á liðnu rekstrarári. Starfs míns vegna hef ég samið fjöldan allan af slíkum ársskýrslum þó engin þeirra hafi til þessa ratað í sérstaka samkeppni. Kannski verður maður slíks heiðurs aðnjótandi síðar á starfsævinni. það er aldrei að vita.

Saturday Night Fever

Diskóið hefur verið allsráðandi hjá mér um helgina. Tók diskóið með mér í ræktina og horfði á hina 30 ára gömlu Saturday Night Fever í gærkvöldi. Tónlistin í SNF er algjör snilld þar sem Bee-Gees eiga hvern smellinn á fætur öðrum og má þar nefna Stayin' Alive, Night Fever, More Than A Woman og How Deep Is Your Love. Önnur frábær diskó-lög í myndinni eru Disco Inferno, You Should Be Dancing og If I Can't Have You. John Travolta á líka frábæra danstakta í SNF og mikið væri nú gaman ef skemmtistaðir á Íslandi væru eitthvað í líkingu við Odyssey 2001 í myndinni... dansgólfið, ljósin, dansarnir, fötin og auðvitað tónlistin.

Diskó

Það er kominn föstudagur og tími til kominn að reima á sig dansskóna. Gamla góða diskó tónlistin stendur alltaf fyrir sínu og Y.M.C.A. með Village People má sín lítils í samanburði við N.M.K.Y. með hinum finnsku Gregorius.

Ekki sjálfgefið að bankarnir séu í Reykjavík

"Björn Ingi Hrafnsson, formaður borgarráðs Reykjavíkur, segir í viðtali við Viðskiptablaðið í dag að ekki sé sjálfgefið að bankarnir séu hér í Reykjavík, þeir gætu verið hvar sem er annarsstaðar í heiminum með höfuðstöðvar sínar." Þetta er alveg rétt hjá Birni Inga og varla eru Vestfirðir undanskildir í því sambandi. Það væri mikið til þess vinnandi að fá höfuðstöðvar einhvers bankans hingað vestur.