Krakkarnir í hverfinu

Það var líf og fjör á Holtastígnum í "gamla daga" enda áttu þá mörg börn heima í hverfinu. Þannig var það nú reyndar alveg fram til þess tíma þegar ég var að alast upp á 9. áratugnum en nú er því miður öldin önnur. Þegar þessi mynd var tekin undir lok 7. áratugsins áttu foreldrar mínir 4 börn á aldrinum 1-7 ára og í húsunum í kring voru einnig mörg börn á svipuðum aldri. Til dæmis bjuggu Addý og Dengsi á þeim tíma á Völusteinsstræti 13 og voru þar með 6 börn og það sjöunda átti eftir að bætast í systkinahópinn. Til gamans má geta þess að það er húsið þeirra sem er fyrir miðri mynd og það er einmitt heimili mitt í dag. Það má einnig geta þess að húsið er aðeins 105 fermetrar að stærð þannig að fermetrarnir í húsinu hafa verið vel nýttir. Ég ætti að vera vel settur næstu árin í þessu húsi enda má segja sem svo að ég geti bætt við mig 6 börnum áður en ég þurfi að fá mér stærra húsnæði.

Þjóðólfsvegur

Svona var umhorfs á Þjóðólfsveginum seint á 7. áratugnum. Ekkert malbik, aðeins einbreiður malarvegur og byggðin rétt að teygja sig upp fyrir Hlíðarstrætið.

Svartur sjór af síld

Á 7. áratugnum var síldarævintýri við Íslandsstrendur og var þá oft svartur sjór af síld. Bæði pabbi og afi voru á síld á þessum árum og þóttu miklir aflaskipstjórar.

Gamlar myndir

Ég notaði kvöldið til að skanna inn gamlar slides-myndir úr safni foreldra minna. Þar voru margar skemmtilegar myndir sem m.a. sýndu hvernig 17. júní hátíðarhöldin í Bolungarvík fóru fram á 7. áratugnum. Hér er það líklega sjálf Fjallkonan sem er í sviðsljósinu uppi á Skeiði, ég þekki ekki fólkið á myndinni... en mikið var bílafloti Bolvíkinga flottur á þessum tíma...

Fjármálapælingar

Peningar eru dýrir í dag, vextir eru háir og erfitt er jafnvel fyrir stöndug fyrirtæki að fá peninga að láni. Lægð á verðbréfamörkuðum og veiking krónunnar hefur einnig áhrif á okkur öll, innfluttar vörur hækka í verði og erlendu lánin okkar verða dýrari. Á slíkum tímum eru lausnarorðin sparnaður og aðhald í fjármálum. Það þýðir að draga úr óþarfa eyðslu og fresta framkvæmdum. Það tekur á að neita sér um eitt og annað en til lengri tíma litið verður ekki hjá því komist.

Bolvískur sigur

Sigur Bolvíkinga í 2. deild Íslandsmót skákfélaga var aldrei í hættu enda var liðið skipað skáksnillingum á hverju borði. Á næsta ári verður því gerð atlaga að Íslandsmeistaratitlinum sem nú er í höndum Taflfélags Reykjavíkur. Ég óska bolvískum skákmönnum til hamigju með sigurinn.

Gúrkutíð

Sameiningardraugurinn flögrar nú á milli byggðarlaga við Djúp. Blaðamenn rýna í útboðsgögn vegna smáverka í Bolungarvík og lesa út úr þeim sameiningu Bolungarvíkur og Ísafjarðarbæjar. Ef til vill er þarna um að ræða mistök hjá starfsmönnum sameiginlegrar tæknideildar sveitarfélaganna sem hafa gleymt að skipta út nöfnum í útboðsgögnunum, slíkt gerist stundum þegar copy/paste aðferðin er notuð. Þegar svona fréttir fara í loftið er ástæða til að brosa og hlægja að vitleysunni sem á það til að birtast í fjölmiðlum.

Nýr Víkari

Nú er nýr www.vikari.is kominn í loftið. Nýi vefurinn er blár að lit líkt og bæjarmerki Bolungarvíkur og er það nokkur framför eftir rúmlega fjögur ár í KR-litunum. Samt sem áður er við því að búast að einhvað gott fólk eigi eftir að benda Víkarann við Sjálfstæðisflokkinn vegna bláa litsins. Ég vona að Bolvíkingar og aðrir lesendur www.vikari.is verði ánægðir með breytingarnar sem eiga að vera til batnaðar.

Endurskoðun

Eftir úrslit dagsins liggur við að maður þurfi að endurskoða hvaða félagslið á Englandi nýtur stuðnings manns.

Club Voice

Mér til mikillar ánægju er íslenska útvarpsstöðin Club Voice komin í loftið... eða réttara sagt á netið. Á Club Voice er ekkert kjaftæði og þar ræður hágæða rafvirkjapopp ríkjum allan sólarhringinn.

 

Dave Spoon ft. Lisa Maffia - Bad Girl (At Night)