Kappakstur er dauðans alvara

Enn og aftur er ég að verða vitni að því að kappakstur er stundaður innanbæjar hérna í  Bolungarvík. Það virðist sem ákveðnir ökumenn noti báðar akreinar Aðalstrætisins í "spyrnu" og keppa þannig í því hvor sé á hraðskreiðari bíl. Stuttu áður en ökuþórar kvöldsins geystust í gegnum miðbæinn á yfir 100 kílómetra hraða áttu börn leið yfir götuna - það þarf ekki mikið til að stórslys verði við slíkar aðstæður.

Ég hef áður minnst á þennan glæfraakstur sem stundaður er hér á aðalgötu bæjarins á kvöldin. Það er eins og að síðan löggæslan færðist alfarið inn á Ísafjörð hafi umferðareftirliti lögreglunar farið aftur hér í bænum, í það minnsta eru lögreglubílar sjaldséðir á götum bæjarins þessa dagana.

Ég veit hvaða bílar það voru sem óku á ógnarhraða eftir Aðalstrætinu í kvöld en ég ætla ekki að gefa upp hverjir það voru að svo stöddu. Hins vegar skora ég á lögregluna að láta sjá sig oftar í Bolungarvík en það eitt að lögreglan sé sýnileg á götum bæjarins getur komið í veg fyrir að ökumenn freistist til að haga sér með þessum glæfralega hætti.

Athugasemdir

[Hallgrímur Óli Helgason, 5.8.2007 kl. 09:32]

tek undir með þér Baldur, hef orðið vitni að þessu sjálfur, þar sem ég geng mjög mikið um bæinn, já og lítið fer fyrir lögreglubílum á ferðinni

[Katrín, 6.8.2007 kl. 22:31]

Ég er nú ekki sammála því að lögreglanláti sjá sig sjaldnar hér en áður.  Meira segja sé ég lögreglubílana á ferð um bæinn oftar en áður....voru svona meira kyrrir hér áður fyrr  Hvað hraðaksturinn varðar þá verð ég lítið vör við hann enda bý upp á Hjöllum en mér finnst að þeir sem verða vitni að slíku eiga að sinna sinni borgaralegu skyldu og tilkynna þessa ökuþora til lögreglu med det samme...

[nöldrarinn á Vitastígnum (IP-tala skráð) 11.8.2007 kl. 20:32]

Sammála síðasta ræðumanni - það er að mínu mati skylda okkar að láta yfirvaldið vita.

Eins finnst mér full mikill hraði á ökutækjunum sem eiga leið niður Vitastíginn. Þú kannski mátt hafa auga með honum í leiðinni kæri.

[Baldur Smári Einarsson, 13.8.2007 kl. 16:16]

Svo að það sé á hreinu þá hafa ökuþórarnir verið tilkynntir til lögreglu þegar hægt hefur verið að greina hverjir voru á ferð í það og það skiptið.